महाराष्ट्रात दुधाचे दर वाढले; आजपासून नवीन दर लागू
महाराष्ट्रातील सर्वसामान्यांना महागाईचा आणखी एक झटका बसला असून मंगळवार (११ ऑगस्ट)पासून दुधाच्या दरात वाढ करण्यात आली आहे. प्रमुख सहकारी व खासगी डेअरींच्या निर्णयानुसार गाय आणि म्हशीच्या दुधाच्या दरात प्रति लिटर २ रुपयांची वाढ लागू झाली आहे.
दूध उत्पादक व प्रक्रिया करणारे कल्याण संघटनेच्या बैठकीत हा निर्णय घेण्यात आला. संघटनेचे अध्यक्ष गोपाळराव म्हस्के यांच्या अध्यक्षतेखाली झालेल्या बैठकीत वाढत्या खर्चाचा आढावा घेण्यात आला.
डिझेलच्या दरात सुमारे १० रुपयांनी वाढ, तसेच पॅकेजिंग खर्चात सुमारे ३० टक्के वाढ झाल्यामुळे दरवाढ अपरिहार्य असल्याचे संघटनेने स्पष्ट केले. याशिवाय दुधाच्या खरेदी दरातही वाढ झाली असून पुढे आणखी वाढ होण्याची शक्यता व्यक्त करण्यात आली आहे.
या पार्श्वभूमीवर दुधाच्या विक्री दरात प्रति लिटर २ रुपयांची वाढ करण्यात आली असून दही, पनीर आदी दुग्धजन्य पदार्थांच्या दरातही सुमारे १० टक्क्यांपर्यंत वाढ लागू करण्यात आली आहे. सुधारित दर आजपासून राज्यभर लागू झाले आहेत.
