Blinkit वर FDAची कारवाई; मालाडमधील परवाना निलंबित

मुंबई : अन्न व औषध प्रशासनाने (FDA) राज्यभर राबवलेल्या विशेष मोहिमेदरम्यान Blink Commerce Private Limited (Blinkit)च्या मालाड पश्चिम येथील आस्थापनात गंभीर त्रुटी आढळून आल्याने कंपनीचा अन्न परवाना तत्काळ निलंबित करण्यात आला आहे. 7 ते 9 ऑगस्टदरम्यान ही मोहीम राबवण्यात आली होती.
दूध व दुग्धजन्य पदार्थ, खाद्यतेल, मसाले, बेकरी उत्पादने, बाटलीबंद पाणी तसेच प्रतिबंधित पान मसाला आणि गुटख्याच्या विक्रीविरोधात FDAने ही कारवाई केली. तपासणीदरम्यान संबंधित आस्थापनात अन्न सुरक्षा नियमांचे उल्लंघन आढळल्याने परवाना निलंबित करण्याचा निर्णय घेण्यात आला.
परवाना निलंबित केल्यानंतर संबंधित आस्थापनाला कोणत्याही प्रकारचा अन्न व्यवसाय सुरू ठेवण्यास मनाई करण्यात आली आहे. निलंबनाच्या कालावधीत अन्नपदार्थांची साठवणूक, विक्री किंवा वितरण करता येणार नाही, असे प्रशासनाने स्पष्ट केले आहे.
FDAच्या माहितीनुसार, अन्न व्यवसाय करणाऱ्या प्रत्येक आस्थापनाकडे वैध अन्न परवाना किंवा नोंदणी असणे बंधनकारक आहे. अन्न सुरक्षा आणि मानके कायदा, 2006 अंतर्गत स्वच्छता, साठवणूक आणि अन्नाच्या गुणवत्तेबाबतचे नियम काटेकोरपणे पाळणे आवश्यक आहे. नियमांचे उल्लंघन केल्यास नोटीस, माल जप्ती, परवाना निलंबन किंवा इतर कायदेशीर कारवाई केली जाऊ शकते.
या कारवाईमुळे ऑनलाइन किराणा व खाद्यपदार्थ वितरण करणाऱ्या कंपन्यांच्या अन्न सुरक्षा नियमांच्या पालनाबाबत पुन्हा प्रश्न उपस्थित झाले आहेत. ग्राहकांच्या आरोग्याच्या दृष्टीने अन्नपदार्थांची गुणवत्ता व सुरक्षितता सुनिश्चित करण्यासाठी FDAकडून अशा मोहिमा पुढेही सुरू राहणार असल्याचे संकेत मिळत आहेत.
दरम्यान, ग्राहकांनी अन्नपदार्थ खरेदी करताना पॅकेजिंग, उत्पादन व वापराची अंतिम तारीख, तसेच लेबलवरील माहिती तपासण्याचे आवाहन प्रशासनाकडून करण्यात आले आहे.