अमेरिकेत बेकायदा स्थलांतरित भारतीयांवर तीव्र कारवाई

अमेरिकेत वैध कागदपत्रांशिवाय वास्तव्यास असलेल्या सुमारे 18 हजार भारतीय नागरिकांवर ट्रम्प प्रशासनाने मोठी कारवाई सुरू केली आहे. राष्ट्राध्यक्ष डोनाल्ड ट्रम्प यांच्या नेतृत्वाखाली बेकायदा स्थलांतरितांविरोधातील हद्दपारी मोहीम अधिक आक्रमक करण्यात आली असून, संबंधित भारतीयांना भारतात परत पाठविण्याची प्रक्रिया वेगाने सुरू असल्याची माहिती समोर आली आहे.

याआधी अशा प्रकरणांमध्ये संबंधित व्यक्तींना अपील करण्याची, न्यायालयात बाजू मांडण्याची किंवा वकील नियुक्त करण्याची संधी दिली जात असे. मात्र, नव्या कारवाईत अनेकांना थेट ताब्यात घेऊन डिटेन्शन सेंटरमध्ये हलवले जात असल्याचे वृत्त आहे.

ट्रम्प प्रशासनाने संपूर्ण अमेरिकेत बेकायदा वास्तव्यास असलेल्या नागरिकांचा शोध घेण्यासाठी विशेष मोहीम सुरू केली आहे. विविध तपास यंत्रणा आणि इमिग्रेशन अधिकारी संयुक्तपणे छापेमारी करत असून, वैध कागदपत्रे नसलेल्या नागरिकांना ताब्यात घेतले जात आहे. त्यामुळे भारतीय समुदायात चिंता व्यक्त होत आहे.

हद्दपारी मोहिमेला गती देण्यासाठी टेक्सास आणि कॅलिफोर्निया येथे मोठी डिटेन्शन केंद्रे उभारण्यात आली आहेत. 2025 मध्ये 3,567 तर 2026 च्या जूनअखेरपर्यंत 1,076 भारतीय नागरिकांना अमेरिकेतून परत पाठवण्यात आले आहे. येत्या काळात ही संख्या आणखी वाढण्याची शक्यता व्यक्त केली जात आहे.

दरम्यान, इमिग्रेशन तज्ज्ञांनी अमेरिकेत राहणाऱ्या भारतीयांना आपली व्हिसा व इमिग्रेशन कागदपत्रे अद्ययावत ठेवण्याचा तसेच कोणतीही नोटीस मिळाल्यास त्वरित कायदेशीर सल्ला घेण्याचा सल्ला दिला आहे.