कोकणातील बेकायदेशीर जमीन व्यवहारांवर सरकारचा लगाम
कोकणातील बेकायदेशीर जमीन व्यवहारांवर सरकारने कडक भूमिका घेतली असून सिंधुदुर्ग जिल्ह्यातील दोडामार्ग तालुक्यातील संशयित खरेदी व्यवहारांची उच्चस्तरीय चौकशी करण्याची घोषणा महसूल मंत्री चंद्रशेखर बावनकुळे यांनी विधानसभेत केली. परप्रांतीयांकडून कुळकायद्याचे उल्लंघन करून करण्यात आलेल्या जमीन खरेदी प्रकरणांची सखोल छाननी केली जाणार आहे.
विभागीय आयुक्तांच्या नेतृत्वाखाली ही चौकशी पार पडणार असून, बेकायदेशीर व्यवहार सिद्ध झाल्यास संबंधित जमिनी सरकारजमा करण्यात येणार असल्याचे स्पष्ट करण्यात आले आहे. या प्रकरणाचा सविस्तर अहवाल आगामी अधिवेशनात सादर केला जाणार आहे.
दरम्यान, राज्यभरातील जमीन व्यवहारांवर नियंत्रण आणण्यासाठी सरकार डिजिटल यंत्रणा अधिक सक्षम करण्याच्या तयारीत आहे. जमीन व्यवहारांचे मॅपिंग करून गैरप्रकारांना आळा घालण्याचा प्रयत्न केला जाणार असून, भूमाफियांविरोधात कठोर कारवाईचा इशाराही सरकारकडून देण्यात आला आहे.
