बसंत मेघवालची ‘रुपेरी’ भरारी; शाहनवाझला कांस्यपदक

युजीन (अमेरिका) : २० वर्षांखालील जागतिक अॅथलेटिक्स स्पर्धेत भारताच्या बसंत कुमार मेघवाल आणि शाहनवाझ खान यांनी दमदार कामगिरी करत अनुक्रमे रौप्य आणि कांस्यपदकाची कमाई केली. या कामगिरीमुळे भारताने एकाच दिवशी दोन पदके जिंकण्याचा ऐतिहासिक पराक्रम साधला. विशेष म्हणजे, उंच उडीत पदक जिंकणारा मेघवाल हा पहिला भारतीय ठरला.

राजस्थानमधील अनुपगढ येथील १९ वर्षीय बसंत कुमार मेघवालने उंच उडीत २.२१ मीटरची वैयक्तिक सर्वोत्तम कामगिरी नोंदवत रौप्यपदक पटकावले. भारतीय नौदलात कार्यरत असलेल्या मेघवालने यंदाच्या हंगामात आपल्या कामगिरीत तब्बल १० सेंटीमीटरची सुधारणा केली आहे. त्याला भारताची माजी राष्ट्रीय विक्रमवीर उंच उडीपटू सहाना कुमारी यांचे मार्गदर्शन लाभत आहे.

उंच उडीच्या अंतिम फेरीत अल्जेरियाच्या युनेस अयाचीने सुवर्णपदक, तर ग्रेट ब्रिटनच्या ओटिस पूलने कांस्यपदक जिंकले. तिन्ही खेळाडूंनी २.२१ मीटरची उंची पार केली; मात्र ‘काउंटबॅक’ नियमानुसार अयाचीने पहिल्याच प्रयत्नात ही उंची पार केल्याने त्याला सुवर्णपदक मिळाले. मेघवालने दुसऱ्या प्रयत्नात उंची पार केल्याने त्याला रौप्य, तर पूलने तिसऱ्या प्रयत्नात उंची पार केल्याने कांस्यपदक मिळाले. २.२४ मीटरची उंची मात्र तिघांनाही पार करता आली नाही.

दरम्यान, पुरुषांच्या लांब उडीत भारताच्या १८ वर्षीय शाहनवाझ खानने ७.८४ मीटरची वैयक्तिक सर्वोत्तम उडी मारत कांस्यपदक जिंकले. त्याने तिसऱ्या प्रयत्नात ही सर्वोत्तम कामगिरी केली. त्याच्या अन्य उड्या ७.५२, ७.८३ आणि ५.३७ मीटर अशा राहिल्या. या प्रकारात इटलीच्या डॅनियल इन्झोलीने ७.९७ मीटर उडी मारत सुवर्णपदक जिंकले, तर ऑस्ट्रेलियाच्या मेसन मॅकग्रोडरने ७.९६ मीटर उडीसह रौप्यपदक पटकावले.

याच प्रकारात भारताच्या आर.सी. जिथिन अर्जुननने ७.५९ मीटरच्या सर्वोत्तम उडीसह आठवे स्थान मिळवले. तसेच भारतीय महिलांच्या ४x४०० मीटर रिले संघाने पात्रता फेरीत ३:३९.५३ मिनिटांची वेळ नोंदवत तिसरे स्थान मिळवले आणि अंतिम फेरीत प्रवेश केला. या संघात भूमिका नेहते, तहुरा खातून, तनु चौधरी आणि थिया अरुमगम यांचा समावेश आहे.

या स्पर्धेत भारताची एकूण पदकसंख्या तीनवर पोहोचली असून, युवा खेळाडूंच्या या यशामुळे भारतीय अॅथलेटिक्सला नवी उभारी मिळाली आहे.