रियाधमध्ये भीषण आग; १६ बांगलादेशी कामगारांचा मृत्यू
रियाध (सौदी अरेबिया) : रियाधमधील मुसा सानिया भागातील एका सोफा कारखान्यात लागलेल्या भीषण आगीत १६ बांगलादेशी कामगारांचा दुर्दैवी मृत्यू झाला आहे. या घटनेची अधिकृत पुष्टी बांगलादेशच्या परराष्ट्र मंत्रालयाने केली असून, मृतांच्या कुटुंबीयांप्रति तीव्र शोक व्यक्त करण्यात आला आहे.
ही दुर्घटना रविवारी दुपारी स्थानिक वेळेनुसार सुमारे ३.३० वाजता घडली. आग लागल्यानंतर ती अत्यंत वेगाने पसरल्याने संपूर्ण कारखाना काही वेळातच जळून खाक झाला. आगीचे नेमके कारण अद्याप स्पष्ट झाले नसून, याबाबत चौकशी सुरू आहे.
घटनेची माहिती मिळताच रियाधमधील बांगलादेश दूतावासाचे अधिकारी तातडीने घटनास्थळी पोहोचले. मृतांची ओळख पटविणे, मृतदेह मायदेशी पाठविणे तसेच आवश्यक कायदेशीर प्रक्रिया पूर्ण करण्यासाठी दूतावास सौदी प्रशासनाशी समन्वय साधत आहे.
दरम्यान, या दुर्घटनेत बाधित कुटुंबांना सर्वतोपरी मदत केली जाईल, असे बांगलादेश सरकारतर्फे स्पष्ट करण्यात आले आहे.
