स्टिंग’ एनर्जी ड्रिंकवर निर्बंध; शाळांपासून 500 मीटर परिसरात विक्रीबंदी

 राज्य विधिमंडळाच्या पावसाळी अधिवेशनात अन्न सुरक्षा आणि विद्यार्थ्यांच्या आरोग्याचा महत्त्वाचा मुद्दा चर्चेत आला. राज्यातील शाळांच्या 500 मीटर परिसरात ‘स्टिंग’ एनर्जी ड्रिंकच्या विक्रीवर बंदी घालण्याचा निर्णय सरकारने जाहीर केला आहे. ही माहिती अन्न व औषध प्रशासन मंत्री नरहरी झिरवळ यांनी सभागृहात दिली.

‘स्टिंग’मध्ये लहान मुलांसाठी घातक ठरू शकणारे घटक आढळल्याच्या पार्श्वभूमीवर हा निर्णय घेण्यात आल्याचे त्यांनी स्पष्ट केले. विद्यार्थ्यांमध्ये वाढत्या प्रमाणात एनर्जी ड्रिंक सेवनाबाबत पालक आणि तज्ज्ञांकडून चिंता व्यक्त केली जात होती.

दरम्यान, अन्न व औषध प्रशासन आयुक्त तुकाराम मुंढे यांच्या नेतृत्वाखाली राज्यभर अन्नसुरक्षा नियमांचे उल्लंघन करणाऱ्या आस्थापनांवर धडक कारवाई सुरू आहे. भेसळयुक्त आणि निकृष्ट दर्जाच्या खाद्यपदार्थांवर कठोर कारवाई करत प्रशासनाने नियमांची अंमलबजावणी अधिक कडक केली आहे.

विद्यार्थ्यांच्या आरोग्याला प्राधान्य देत घेतलेल्या या निर्णयामुळे अन्नसुरक्षा आणि सार्वजनिक आरोग्याचा मुद्दा अधिवेशनात विशेष चर्चेत आला आहे.