उद्याची TET परीक्षा रद्द; पेपरफुटी प्रकरणी तिघा संशयितांना ताब्यात

  राज्यातील शिक्षक पात्रता परीक्षा (TET) पेपरफुटीप्रकरणी पोलिसांनी मोठी कारवाई करत तिघा संशयितांना ताब्यात घेतले आहे. या घटनेमुळे 28 जून रोजी होणारी परीक्षा तत्काळ रद्द करण्यात आली असून राज्यभरात खळबळ उडाली आहे.
भिवंडीतील कोनगाव परिसरात गुप्त माहितीच्या आधारे पोलिसांनी सापळा रचला होता. पुढील तपासात मुंबईतील सहारा एअरपोर्ट परिसरातून तिघांना ताब्यात घेण्यात आले. त्यांच्या ताब्यातून प्रश्नपत्रिकेशी संबंधित महत्त्वाचे दस्तऐवज जप्त झाल्याची माहिती समोर आली आहे.
या प्रकरणी कोनगाव पोलिस ठाण्यात गुन्हा नोंदविण्याची प्रक्रिया सुरू असून मोठ्या रॅकेटचा संशय व्यक्त केला जात आहे. दरम्यान, परीक्षा रद्द झाल्याने उमेदवारांमध्ये संभ्रमाचे वातावरण असून नव्या तारखेची प्रतीक्षा लागली आहे.