ISROचा ‘तिसरा डोळा’ अंतराळात; EOS-05 चे यशस्वी प्रक्षेपण

भारतीय अंतराळ संशोधन संस्था (ISRO) ने अंतराळ क्षेत्रात आणखी एक मोठी झेप घेत GSLV-F17 रॉकेटच्या मदतीने अत्याधुनिक पृथ्वी निरीक्षण उपग्रह EOS-05 चे यशस्वी प्रक्षेपण केले. आंध्र प्रदेशातील सतीश धवन अंतराळ केंद्रावरून झालेले हे प्रक्षेपण भारताच्या सुरक्षा आणि तंत्रज्ञान क्षमतेसाठी महत्त्वपूर्ण मानले जात आहे.

EOS-05 हा उपग्रह सुमारे 36,000 किमी उंचीवरून देशाचे सतत निरीक्षण करणार असून, जवळजवळ रिअल-टाइम इमेजिंग क्षमता असल्यामुळे सीमाभागांवर नजर ठेवणे अधिक अचूक आणि प्रभावी होणार आहे. त्यामुळेच या उपग्रहाला भारताचा ‘तिसरा डोळा’ असेही संबोधले जात आहे.

GSLV-F17 हे सुमारे 51.7 मीटर उंच आणि 420.5 टन वजनाचे शक्तिशाली प्रक्षेपण यान असून, या मोहिमेद्वारे GTO/सब-GTO कक्षेत प्रक्षेपित करण्यात आलेला हा आतापर्यंतचा सर्वात जड उपग्रह ठरला आहे. ही GSLV मालिकेतील 19 वी यशस्वी मोहीम आहे.

इस्रो प्रमुख डॉ. व्ही. नारायणन यांनी या यशाबद्दल समाधान व्यक्त करत, “हा देशासाठी अभिमानाचा क्षण आहे. काही मिनिटांच्या प्रक्षेपणामागे अनेक वर्षांची मेहनत असते,” असे सांगितले. मोहिमेचे संचालक थॉमस कुरियन यांनीही या प्रक्षेपणाला ऐतिहासिक ठरवले.

दरम्यान, केंद्रीय विज्ञान आणि तंत्रज्ञान मंत्री डॉ. जितेंद्र सिंह यांनी इस्रोच्या कामगिरीचे कौतुक करत, “भारत अंतराळ क्षेत्रात नवे उच्चांक गाठत असून जागतिक अंतराळ शक्ती म्हणून आपली ओळख अधिक मजबूत करत आहे,” असे म्हटले.

या यशस्वी मोहिमेमुळे भारताच्या संरक्षण, आपत्ती व्यवस्थापन आणि सीमाभागातील निगराणी क्षमतेत मोठी वाढ होणार आहे.