इराण- अमेरिका तणाव पुन्हा टोकाला; ट्रम्प यांची विनाशकारी धमकी

   मध्य-पूर्वेत पुन्हा एकदा तणावाचे वातावरण निर्माण झाले असून, अमेरिका आणि इराण यांच्यातील वाद चिघळण्याची चिन्हे दिसत आहेत. इराणचे माजी सर्वोच्च नेते अयातुल्ला अली खामेनी यांच्या अंत्यविधीदरम्यान अमेरिकेचे राष्ट्राध्यक्ष डोनाल्ड ट्रम्प यांच्या हत्येची मागणी करणारे पोस्टर झळकले. या घटनेनंतर अमेरिकेने कठोर भूमिका घेत इराणला थेट इशारा दिला आहे.

डोनाल्ड ट्रम्प यांनी आपल्या सोशल मीडिया पोस्टमध्ये म्हटले आहे की, अमेरिकेने 1000 क्षेपणास्त्रे सज्ज ठेवली असून ती थेट इराणच्या दिशेने रोखलेली आहेत. इराणकडून कोणतीही आक्रमक कारवाई झाल्यास तात्काळ आणखी हजारो क्षेपणास्त्रे डागली जातील आणि इराणला मोठा फटका बसू शकतो, असा इशाराही त्यांनी दिला आहे.

यापूर्वी न्यूयॉर्क पोस्टला दिलेल्या मुलाखतीत ट्रम्प यांनी सांगितले होते की, ते बराच काळ इराणच्या निशाण्यावर आहेत. जर त्यांच्या हत्येचा प्रयत्न झाला, तर त्यांनी अशा हल्ल्याचे आदेश दिले आहेत, जे इराणने यापूर्वी कधीही पाहिले नसतील. “जर माझी हत्या झाली, तर इराणवर बॉम्ब टाका,” असेही त्यांनी स्पष्टपणे म्हटले होते.

दरम्यान, इस्रायलच्या गुप्तचर संस्थांनी अमेरिकेला दिलेल्या माहितीनुसार, इराणकडून ट्रम्प यांच्या हत्येचा नवीन कट रचला जात असल्याचा गंभीर इशारा देण्यात आला आहे. या घडामोडींमुळे मध्य-पूर्वेतील परिस्थिती आणखी तणावपूर्ण बनण्याची शक्यता व्यक्त केली जात आहे.