पाकिस्तान-तुर्की-सौदी आघाडी; भारतासाठी नवे संकट?
सौदी अरेबिया, तुर्की आणि पाकिस्तान यांच्यात झालेल्या ‘मक्का करार’मुळे प्रादेशिक राजकारणात नव्या घडामोडींना वेग आला आहे. या करारात आता बांगलादेशही सहभागी होण्याची शक्यता व्यक्त होत असून, त्यामुळे भारतासाठी संभाव्य रणनीतिक आव्हान उभे राहण्याची चर्चा सुरू झाली आहे.
७ ऑगस्ट रोजी झालेल्या या करारानुसार, सदस्य देशांपैकी कोणत्याही एका देशावर हल्ला झाल्यास तो तिन्ही देशांवरील हल्ला मानला जाणार आहे. त्यामुळे ही केवळ राजनैतिक नव्हे तर सुरक्षाविषयक आघाडी मानली जात आहे.
दरम्यान, बांगलादेशातील काही मंत्र्यांनी या करारात सहभागी होण्याचा विचार सुरू असल्याचे संकेत दिले आहेत. बांगलादेशचे मंत्री हूमायूं कबीर यांनी, मध्यपूर्वेतील इस्लामिक देशांमध्ये सुरक्षा व्यवस्था उभी राहत असल्यास त्यात सहभागी होण्याचा विचार करणे स्वाभाविक असल्याचे म्हटले आहे.
जर बांगलादेश या आघाडीत सहभागी झाला, तर पाकिस्तान, तुर्की आणि सौदी अरेबियासोबत तो चौथा देश ठरेल. त्यामुळे दक्षिण आशियातील आणि मध्यपूर्वेतील रणनीतिक समीकरणांमध्ये बदल होण्याची शक्यता व्यक्त केली जात आहे.
या घडामोडींवर भारतासह आंतरराष्ट्रीय पातळीवर लक्ष ठेवले जात असून, पुढील काही दिवसांत परिस्थिती अधिक स्पष्ट होण्याची शक्यता आहे.
