डॉल्फिन चक्रीवादळाचा परिणाम; महाराष्ट्रात पावसाला ब्रेक, १५ ऑगस्टनंतर पुन्हा सक्रियतेचा अंदाज
महाराष्ट्रात सध्या मान्सून पावसाची तीव्रता कमी झाली असून अनेक भागांत पावसाला ब्रेक लागल्याचे चित्र आहे. या बदलामागे प्रशांत महासागरातील ‘डॉल्फिन’ चक्रीवादळाचा अप्रत्यक्ष परिणाम असल्याचे हवामान तज्ज्ञांनी स्पष्ट केले आहे. यामुळे वातावरणातील वारे आणि दाबाच्या प्रणालीत बदल होऊन राज्यात कोरडे वातावरण निर्माण झाले आहे.
याशिवाय ‘एल निनो’चा प्रभाव आणि अफगाणिस्तानच्या दिशेने येणारे कोरडे वारे यामुळेही पावसाची स्थिती कमकुवत झाली आहे. परिणामी, राज्यातील अनेक जिल्ह्यांमध्ये अपेक्षित पावसाऐवजी उष्ण आणि कोरडे वातावरण जाणवत आहे.
हवामान खात्याच्या अंदाजानुसार, ही परिस्थिती साधारणपणे १५ ऑगस्टपर्यंत कायम राहण्याची शक्यता आहे. त्यानंतर मान्सून पुन्हा सक्रिय होऊन राज्यात पावसाचा जोर वाढण्याची चिन्हे आहेत. विशेषतः कोकण, घाटमाथा आणि काही मध्य महाराष्ट्रातील भागांत पुन्हा जोरदार सरींची शक्यता वर्तवण्यात आली आहे.
दरम्यान, देशभरात ११ ते १६ ऑगस्टदरम्यान पुन्हा पावसाची सक्रियता वाढण्याचा अंदाज हवामान खात्याने वर्तवला असून महाराष्ट्रातही या काळात काही भागांत जोरदार पावसाची शक्यता आहे.
सध्या मात्र शेतकऱ्यांनी घाईने पेरणी न करता हवामानातील बदल लक्षात घेऊन नियोजन करण्याचा सल्ला तज्ज्ञांकडून देण्यात येत आहे.
