दिल्लीतील सत्य निकेतनमध्ये भीषण दुर्घटना; 5 मजली इमारत कोसळून 6 ठार

दिल्लीतील सत्य निकेतन परिसरात रविवारी दुपारी मोठी दुर्घटना घडली. एका खासगी पेइंग गेस्ट (PG) वसतिगृहाची पाच मजली इमारत काही सेकंदांत कोसळून खळबळ उडाली. या घटनेत आतापर्यंत 6 जणांचा मृत्यू झाला असून अनेक जण जखमी झाले आहेत.

इमारत कोसळल्यानंतर परिसरात गोंधळ आणि भीतीचे वातावरण निर्माण झाले. ढिगाऱ्याखाली अडकलेल्या लोकांना बाहेर काढण्यासाठी अग्निशमन दल, एनडीआरएफ, पोलीस आणि स्थानिक प्रशासनाने तातडीने बचावकार्य सुरू केले. बचावपथकांकडून रात्रभर शोधमोहीम सुरू होती.

प्राथमिक माहितीनुसार, इमारतीच्या तळमजल्यावर आणि बेसमेंटमध्ये नूतनीकरण तसेच बांधकामाचे काम सुरू होते. त्यामुळे इमारतीचा पाया कमकुवत झाल्याचा संशय व्यक्त केला जात आहे. मात्र, इमारत कोसळण्याचे नेमके कारण अद्याप स्पष्ट झालेले नाही.

दरम्यान, घटनेचा थरार सीसीटीव्ही फुटेजमध्ये कैद झाला असून काही क्षणांत संपूर्ण इमारत पत्त्यांच्या बंगल्यासारखी कोसळताना दिसते. या फुटेजमुळे दुर्घटनेची तीव्रता अधिक स्पष्ट झाली आहे.

मुख्यमंत्री रेखा गुप्ता यांनी घटनास्थळी भेट देऊन बचावकार्याचा आढावा घेतला. तसेच जखमींवर एम्स रुग्णालयात उपचार सुरू आहेत. प्रशासनाकडून प्रकरणाचा तपास सुरू असून सुरक्षा नियमांचे उल्लंघन झाले का, याची चौकशी केली जात आहे.