नेपाळमध्ये पूरस्थिती गंभीर; तिबेटमधील धरण फुटल्याने हाय अलर्ट

 नेपाळमध्ये आधीच हिमनदी फुटल्यामुळे निर्माण झालेल्या पूरस्थितीत आता आणखी गंभीर भर पडली आहे. तिबेट सीमेच्या भागात असलेले एक धरण फुटल्याने त्रिशूली नदीच्या खोऱ्यात मोठ्या प्रमाणावर पाणी येण्याची भीती व्यक्त करण्यात येत आहे. या पार्श्वभूमीवर नेपाळ पोलिसांनी संपूर्ण नदीकाठच्या भागांसाठी हाय अलर्ट जारी केला आहे.

मिळालेल्या माहितीनुसार, हे धरण गेल्या दोन दिवसांपासून तुंबलेले होते आणि ते 72 तासांत फुटू शकते, असा इशारा चीनकडून आधीच देण्यात आला होता. अखेर हे धरण फुटल्याने परिस्थिती अधिकच गंभीर झाली आहे. चोचेन खोला आणि पुरेपु त्सांगपो नद्यांच्या संगमाजवळ तयार झालेला हा तलाव फुटल्यामुळे पाणी वेगाने त्रिशूली नदीत येत आहे.

‘ऑनलाइन खबर’ या मीडिया पोर्टलनुसार, रसुवा जिल्ह्याचे मुख्य जिल्हाधिकारी नरेंद्र परियार यांनी या घटनेची अधिकृत पुष्टी केली आहे. त्यांनी सांगितले की, ही माहिती थेट चिनी अधिकाऱ्यांकडून मिळाली असून, प्रशासनाने आधीच नदीकाठच्या रहिवाशांना सतर्कतेचा इशारा दिला होता.

सध्या नदीच्या पाण्याची पातळी अचानक वाढण्याची शक्यता असल्याने त्रिशूली नदीकाठी असलेल्या सर्व सखल भागातील गावांना सतर्कतेचा इशारा देण्यात आला आहे. प्रशासनाने नागरिकांना तातडीने सुरक्षित स्थळी स्थलांतर करण्याचे आणि इतरांनाही या धोक्याबाबत माहिती देण्याचे आवाहन केले आहे. बचाव आणि मदत कार्यासाठी सुरक्षा यंत्रणा सज्ज ठेवण्यात आली आहे.