चमोली बोगदा दुर्घटना; 9 कामगारांचा मृत्यू, बचावकार्य सुरू

उत्तराखंडमधील चमोली जिल्ह्यात अलकनंदा नदीवरील विष्णुगड-पिंपळकोटी जलविद्युत प्रकल्पाच्या बोगद्यात झालेल्या भीषण भूस्खलनात 9 कामगारांचा मृत्यू झाला असून अनेक कामगार अजूनही अडकले आहेत. सध्या सहा कामगारांचा शोध सुरू आहे.

ही दुर्घटना गुरुवारी (13 ऑगस्ट) सायंकाळी सुमारे 7.30 वाजण्याच्या सुमारास घडली. त्यावेळी बोगद्यात 25 हून अधिक कामगार काम करत होते. अचानक झालेल्या स्फोटानंतर बोगद्यात मोठ्या प्रमाणात पाणी आणि ढिगारा शिरल्याने ही दुर्घटना घडल्याची प्राथमिक माहिती समोर आली आहे.

या दुर्घटनेत जखमी झालेल्या 10 कामगारांवर गोपेश्वर येथील जिल्हा रुग्णालयात उपचार सुरू आहेत, तर एकावर श्रीनगर आणि एकावर पिंपळकोटी येथे उपचार सुरू आहेत. एका जखमीला उपचारानंतर घरी सोडण्यात आले आहे.

एनडीआरएफचे सहायक कमांडंट आलोक झायरा यांनी दिलेल्या माहितीनुसार, बोगद्यातील चिखल व पाण्यामुळे बचावकार्याला अडथळे येत असून ऑक्सिजनच्या कमतरतेमुळे काही काळासाठी मोहीम स्थगित करण्यात आली होती. मात्र, शुक्रवारी सकाळी पुन्हा बचावकार्य सुरू करण्यात येणार आहे.

टीएचडीसी-एनटीपीसीद्वारे उभारण्यात येत असलेल्या 444 मेगावॅट क्षमतेच्या या प्रकल्पाचे सुमारे 70 टक्के काम पूर्ण झाले आहे. सुमारे 3.5 किमी लांबीच्या बोगद्यात 1.8 किमी अंतरावर ही दुर्घटना घडली. या घटनेनंतर परिसरात भीतीचे वातावरण निर्माण झाले असून बचावकार्य वेगाने सुरू आहे.