E20 भीतीमुळे ‘100 ऑक्टेन’ पेट्रोलला मागणी वाढली; मोठ्या शहरांत विक्री दुप्पट
देशातील प्रमुख महानगरांमध्ये, विशेषतः दिल्ली-एनसीआरमध्ये, ‘100 ऑक्टेन प्रीमियम’ पेट्रोलच्या विक्रीत गेल्या काही महिन्यांत लक्षणीय वाढ झाल्याचे चित्र समोर आले आहे. काही ठिकाणी ही विक्री दुपटीहून अधिक वाढल्याची नोंद आहे.
E20 (२० टक्के इथेनॉल मिश्रित) पेट्रोलमुळे वाहनांच्या इंजिनवर विपरीत परिणाम होऊ शकतो, या भीतीमुळे अनेक वाहनचालक प्रीमियम पेट्रोलकडे वळताना दिसत आहेत. जुलै महिन्यात या इंधनाच्या मागणीत विशेष वाढ झाल्याचे इंधन विक्रेत्यांनी सांगितले.
विशेषतः हाय-परफॉर्मन्स वाहनांचे चालक ‘100 ऑक्टेन’ पेट्रोलला अधिक पसंती देत आहेत. इंजिनची कार्यक्षमता टिकवून ठेवणे आणि दीर्घकालीन सुरक्षितता सुनिश्चित करण्यासाठी हा पर्याय निवडला जात असल्याचे विक्रेत्यांकडून स्पष्ट करण्यात आले.
दरम्यान, तज्ज्ञांनी मात्र वाहनचालकांना सावधगिरीचा इशारा दिला आहे. E20 इंधनाचा वापर सर्व वाहनांसाठी अनिवार्य नसून, वाहन उत्पादकांनी दिलेल्या मार्गदर्शक सूचनांनुसारच योग्य इंधनाची निवड करणे गरजेचे असल्याचे त्यांनी नमूद केले.
